მთავარი ფოტო: იაპონელი ინჟინრები ვარკეთილში ჰაერის ხარისხის მონიტორინგის სადგურს ამონტაჟებენ | 15 ივლისი, 2016 ფოტო © გარემოს ეროვნული სააგენტო
♦
ჰაერის ხარისხის ავტომატური მონიტორინგის ქსელის ერთ-ერთი სადგური, რომელიც ვარკეთილში იდგა, მოხსნეს და სხვაგან გადაიტანეს. ამ დრომდე არ მიეწოდება მონაცემები ჰაერის პორტალს ვარკეთილიდან.
ადგილი, სადაც ჰაერის ხარისხის ავტომატური სადგური იდგა, ამჟამად მულტიფუნქციური შენობის მთავარი შესასვლელია. გუგლის რუკაზე ახალი კორპუსის მფლობელად მონიშნულია DGroup Sukhishvili Residence - დი გრუპი სუხიშვილი რეზიდენსი.
გარემოს ეროვნულ სააგენტოში "კაქტუსს" არ დაუზუსტეს, რატომ აიღეს სადგური იმ ადგილიდან, სადაც ის იაპონელმა ინჟინრებმა დაამონტაჟეს.
"გადატანილია ისევ ვარკეთილში, მიმდებარე ტერიტორიაზე. ამ ეტაპზე დარჩენილია ტექნიკური დეტალები. უახლოეს პერიოდში სადგური ჩაერთვება ქსელში," - უთხრეს "კაქტუსს" სააგენტოში.
ჰაერის ხარისხის მონიტორინგის სადგური ვარკეთილში 2016 წლის 15 ივლისს დამონტაჟდა და სექტემბერში ამუშავდა. სადგური ქართველ ხალხს იაპონიის საელჩომ აჩუქა. მისი ღირებულებაა 825, 371.87 ლარია. ის ერთ-ერთია საქართველოში ჰაერის ხარისხის მონიტორინგის 15 ავტომატური სადგურიდან, რომელთაგანაც 5 სადგური თბილისში ფუნქციონირებს, ორ-ორი - რუსთავში, ბათუმსა და ქუთაისში, თითო - ზუგდიდში, მესტიასა და თელავში.
სადგურები ხარვეზებით აწვდიან მონაცემებს ჰაერის ხარისხის პორტალს air.gov.ge, სადაც მონაცემები საათში ერთხელ ახლდება.